Centrum Holding Fransiyaning O‘zbekistondagi elchixonasi delegatsiyasi bilan hamkorlikni rivojlantirish istiqbollarini muhokama qildi

21-yanvar kuni Centrum Holding ofisida xolding delegatsiyasi va Fransiyaning O‘zbekiston Respublikasidagi elchixonasi vakillari, Fransiya elchisi janob Valid Fuk boshchiligida ishchi uchrashuv bo‘lib o‘tdi. Uchrashuvda Centrum Holding tomonidan xolding asoschisi va bosh direktori Abdulaziz Abdurahmanov ishtirok etdi. Tomonlar fuqarolik aviatsiyasi, logistika, aviatsiya kadrlarini tayyorlash, shuningdek, Fransiya va O‘zbekiston o‘rtasidagi turizm va investitsiyaviy hamkorlikni rivojlantirish istiqbollarini muhokama qildilar.

Uchrashuv davomida fransuz tomoni O‘zbekiston Respublikasi prezidenti Shavkat Mirziyoyev tomonidan imzolangan 2030-yilgacha fuqarolik aviatsiyasini rivojlantirishga oid hujjatning ahamiyatini qayd etdi. Ushbu hujjat doirasida milliy aviakompaniyalar floti sezilarli darajada kengaytirilishi ko‘zda tutilgan bo‘lib, mamlakatning umumiy havo kemalari parki 180 taga yetkazilishi rejalashtirilgan.

Abdulaziz Abdurahmanov Centrum Holding’ning yo‘lovchi aviakompaniyasi bo‘lgan Centrum Air tasdiqlangan strategiya asosida, zamonaviy va samarali havo kemalaridan foydalanishga urg‘u bergan holda rivojlanishda davom etishini ma’lum qildi. Yo‘lovchi tashuvlarida kompaniya Airbus samolyotlariga, jumladan, A320, A321 va A330 oilasiga tayangan holda ishlaydi. O‘zbekistonda aviatsiya parkini kengaytirish vazifasi doirasida xolding Centrum Air va yuk tashuvchi My Freighter flotini kengaytirish orqali umumiy parkning kamida 50 foizi yoki undan ko‘prog‘ini ta’minlashni rejalashtirmoqda.

Uchrashuvda Centrum Air’ning yo‘nalishlar tarmog‘ini rivojlantirishga alohida e’tibor qaratildi. 2026-yil martidan aviakompaniyaning Yevropaga ilk muntazam reyslari — Frankfurt yo‘nalishi ishga tushirilishi rejalashtirilgan. Parij bilan muntazam aviaqatnovlar esa 2027-yil yozgi jadval doirasida, taxminan aprel oyida ochilishi ko‘zda tutilgan.

Tomonlar Toshkentning tranzit salohiyatidan foydalangan holda xalqaro yo‘nalishlarni rivojlantirish yo‘lovchilar uchun foydali ekanini ta’kidladilar. Qulay geografik joylashuv tufayli Toshkent orqali parvozlar Yevropadan Janubi-Sharqiy Osiyo mamlakatlariga uchishda boshqa yirik aviatsiya xablariga nisbatan o‘rtacha ikki soatgacha vaqt tejash imkonini beradi.

Yuk tashish segmentida My Freighter aviakompaniyasi allaqachon Fransiya, Germaniya, Italiya va Bolqon mintaqasi davlatlari kabi Yevropa mamlakatlariga ko‘plab charter reyslarni amalga oshirayotgani qayd etildi. Bu O‘zbekiston va Yevropa ittifoqi o‘rtasidagi logistika hamkorligining yuqori salohiyatini ko‘rsatadi.

Uchrashuvda aviatsiya xodimlarini tayyorlash va qayta tayyorlash masalalari ham alohida muhokama qilindi. Fransuz tomoni uchuvchilar, muhandislar va yer usti xizmatlari mutaxassislarini o‘qitish bo‘yicha hamkorlikni rivojlantirishga tayyor ekanini bildirdi. Kelgusida tajriba almashish dasturlari, jumladan, Fransiyada, xususan Tuluzada joylashgan o‘quv markazlarida mutaxassislarni tayyorlash hamda sohaga oid ta’lim muassasalari bilan hamkorlik ko‘zda tutilmoqda.

Shuningdek, Centrum Holidays sayyohlik operatori asosida kirish va chiqish turizmni rivojlantirish loyihalari muhokama qilindi. Fransuz tomoni viza jarayonlarini samaraliroq qilish rejalari haqida ma’lumot berib, bu sayyohlik almashinuvining oshishiga xizmat qilishi mumkinligini ta’kidladi.

Centrum Holding Fransiyaning yetakchi kompaniya va tashkilotlari bilan hamkorlikni kengaytirish bo‘yicha o‘z qarashlarini taqdim etdi, jumladan:
CMA CGM — Markaziy Osiyo yo‘nalishida transport yechimlari va kargo-logistika sohasida;
Safran — MRO xizmatlarini rivojlantirish va aviatsiya ehtiyot qismlarini yetkazib berish bo‘yicha;
Simaero — uchuvchilarni tayyorlash sohasida;
Airbus hamda tegishli universitetlar — O‘zbekistonda aviatsiya ekipajlari va muhandis kadrlarini tayyorlaydigan xususiy o‘quv muassasasini tashkil etish tashabbusi doirasida.

Uchrashuv yakunida Fransiya elchisi Valid Fuk fransuz tomoni turli formatlarda hamkorlikni yanada rivojlantirishga tayyor ekanini tasdiqlab, ikki tomonlama loyihalarning yuqori salohiyatini hamda Fransiya va O‘zbekiston o‘rtasidagi o‘zaro manfaatli aloqalarni mustahkamlashga qiziqish borligini qayd etdi.

Kompaniyalar haqida ma’lumot

Airbus – bosh qarorgohi Fransiyada joylashgan, dunyodagi yetakchi aviatsiya texnikasi ishlab chiqaruvchilardan biri, tijorat samolyotlari bo‘yicha global yetakchi.
Safran – aviatsiya, mudofaa va kosmik texnologiyalar sohasida faoliyat yurituvchi yirik fransuz sanoat guruhi.
Simaero – to‘liq funksional aviatsiya trenajyorlari yordamida uchuvchilarni tayyorlashga ixtisoslashgan fransuz kompaniyasi.
CMA CGM – dengiz logistikasi va multimodal transport yechimlari bo‘yicha global yetakchi.