Joylar • 18 Iyun, 2025

Siz – Bishkek markazidasiz

Bishkekka sayohat – bu katta sarguzashtlar oldidan nafas rostlash lahzasidir. Bu yerda uzoq vaqt to‘xtab qolishmaydi: shunchaki bir finjon choy ichishadi, bozordan yong‘oq-pistaning sarasini g‘amlab, yana olisga – tog‘lar, daralar, qaynoq buloqlar va kanyonlar sari oshiqishadi. Biroq biroz shoshilmay to‘xtasangiz shahar o‘zining kutilmagan qirralarini namoyon eta boshlaydi: ko‘cha choyxonalari, Panfilov bog‘ining sokin shiviri va tong sahardagi issiqqina kattamaning ifori... Bu shahar bir qarashda ko‘zga tashlanmasligi mumkin, ammo qayerdan qidirishni bilsangiz u qalbingizning tubidan joy oladi.

Nima bilan shug‘ullanish mumkin?

Shahardagi TOP mashg‘ulotlar:

1. Ala-Too bosh maydonida esdalik uchun suratga tushish.

2. Davlat tarix muzeyida Qirg‘iziston tarixini oʻrganish.

3. Imom Saraxsiy nomidagi markaziy masjid – Osiyo me’moriy durdonasi ulugʻvorligini his qilish.

4. O‘sh bozoridan sovg‘alar xarid qilish.

5. Panfilov bog‘idagi tomosha charxpalagida uchish yoki E.Z. Gareyev nomidagi Botanika bog‘ida sayr qilish.

6. Aytiyev nomidagi Tasviriy san’at milliy muzeyi kollektsiyalarini ko‘rish.

7. Mahalliy choyxonalarni o‘zbekcha choyxonalar bilan solishtirish. Navat yoki “Charpaya”ni tavsiya qilamiz.

8. “Ala-Too” akvaparkida yoki ochiq “Royal Fish” akvaparkida salqinlanish.

9. Asia Mall savdo markazi yoki Dordoy bozorida shopping uyushtirish.

Shahar tashqarisida TOP mashg‘ulotlar:

10. Ala-Archa milliy bog‘ida tabiat goʻzalliklaridan bahra olish.

11. Ala-Archin suv omboridagi suv bosgan o‘rmonda piknik qilish yoki sapda suzish.

12. “Qirg‘iz Grand Kanyoni” – Konorchok darasini ko‘rish.

13. Markaziy Osiyodagi eng qadimiy inshoot – Buran minorasini tomosha qilish.

14. Chunkurchak togʻli hududidagi “Supara” etnokompleksida kun o‘tkazish.

15. “Chunkurchak” kurortida zipline yoki kanat yo‘lida uchish.

16. Moviy sharshara ustidagi Osma ko‘prikdan oʻtib, asablarni sinovdan oʻtkazish.

17. Chu, Chon-Kemin, Narin yoki Kekemeren daryolarida rafting qilish.

18. Oruu-Say, Ak-Tyuz yoki Chunkurchak daralaridan birida trekking qilish.

19. Arashan qishlog‘i yoki Alamudin darasidagi “Issiq buloqlar” kurortida issiq buloqlarda cho‘milish.

20. Issiq-Ko‘l ko‘liga borish – 270 km.

Nimalar olib ketish mumkin:

- Jun gilam;
- Yong‘oq va quritilgan mevalar;
- Qirg‘iz so‘mining chiroyli kupyuralari;
- Charm buyumlar. Sumka, oyoq kiyim, hamyon;
- Mahalliy ustalarning taqinchoqlari.

Nimalarni tatib ko‘rish kerak:

- “Kirgiz Sonunduk” yoki “Kalama” muassalaridagi etno-fastfud;
- Manti;
- Beshbarmoq;
- Qirg‘izcha qatlama;
- Ordo – qirg‘izcha palov.