Joylar • 16 Iyun, 2025
Siz – Issiqko‘l markazidasiz
Bu yerda suv shunchalik tiniqki, ko‘l osmonni o‘z bag‘riga muhrlab qo‘ygandek tuyuladi. Issiqko‘l o‘z xazinalarini ochishga shoshilmaydi: avval to‘lqinlar shovqini va issiq qum tafti, so‘ngra tog‘ daralari, kanyonlar va qaynoq buloqlar, biroz o‘tib esa — quyosh botishidagi chakanda (oblepixa) choyi va o‘tovlar bag‘riga yashiringan afsonalar... Shunchaki yo‘nalish bo‘ylab harakatlaning va yoz nashidasini butun vujudingiz bilan his qiling. Nimalar bilan shug‘ullanish mumkin? Issiqko‘lning asosiy kurorti – Cholpon-Otada va atrofida TOP mashg‘ulotlar 1. Koʻplab sanatoriy yoki pansionatlardan birida dam olish.
2. Top-toza koʻl suvida cho‘milish va plyajlarda hordiq chiqarish, eng mashhurlaridan biri – «Oltin qumlar» plyaji.
3. Ko‘lda yaxta yoki katerda, sup-board yoki kayakda sayr qilish.
4. Baliq ovlash va eng katta baliqni tutish.
5. Bolalar bilan Bosteri posyolkasida hordiq: bu yerda mamlakatdagi eng katta – 76 metrlik tomosha charxpalagi, attraksionlar va kichik akvapark bor.
6. Chingiz Aytmatov nomidagi “Ruh Ordo” madaniyat markaziga tashrif – bu ochiq osmon ostidagi 10 ta mini-muzey.
7. Milliy cholg‘u asbobi – komuz shaklidagi pirsda suratga tushish.
8. Petrogliflar muzeyida (Toshlar bogʻi) qoya rasmlarini tomosha qilish.
9. Gʻuj yulduzlar ostida Cholpon-Otaning tor ko‘chalari boʻylab tungi ekskursiyaga chiqish.
10. Butunjahon ko‘chmanchilar o‘yinlari uchun qurilgan ippodromda ot poygalarini tomosha qilish.
11. Tash Suu yoki Ak-Bermetdagi shifobaxsh issiq buloqlarda cho‘milish.
12. Grigoryev, Semyonov yoki Chon Ak-Suu daralarida tabiatdan zavqlanish.
13. Grigoryev darasida tog‘larda otga minib sayr qilish.
14. Yozgi o‘rmonlar va alp o‘tloqlari bagʻridagi Yuqori ko‘lda dam olish.
15. Bosteri bozoridan mazali mahsulotlar xarid qilish.
16. Issiqko‘l atrofini bir kunda aylanib chiqish – transportli ekskursiya buyurtma qiling.
Karakolda (aeroportdan ≈ 200 km) qilish mumkin boʻlgan TOP ishlar 17. Mars sayyorasini eslatuvchi «Ertak» kanyonida tosh ajdarlar va qasrlar oralab sayr qilish. 18. Paraplanda uchib, Issiqko‘l manzarasini yuqoridan ko‘rish. 19. Jeti-Og‘uz darasining go‘zalligidan hayratga tushish – qizil qoyalar, «Yaralgan yurak» qoyasi va 50 metrlik «Qizning ko‘z yoshlari» sharsharasi. 20. Tabiat goʻzalligi va sukunat izlovchilar uchun – oʻtov lagerlari, issiq buloqlar va alp o‘tloqlari boʻlgan Altin-Arashan darasiga tashrif buyurish. Nimalarni tatib ko‘rish kerak: - Beshbarmoq; - Palov; - Issiqko‘l foreli; - Katlama – qirg‘izcha qatlamali non; - «Issiqko‘l shomlari» nomli choy ichimligi. Nimalarni olib kelish mumkin: - Chakandadan (oblepixa) mahsulotlar – choylar, asalga qorilgan rezavorlar; - Mahalliy qora smorodina murabbosi; - Asal; - Quritilgan dorivor o‘tlar; - Kigiz buyumlar – masalan, tuflilar.
