Centrum Air Verteil negizida aviayuklar va tashuvlar riteylingi hamda distributsiyasi uchun yangi avlod platformasini ishga tushirmoqda

Toshkent, O‘zbekiston / Kochi, Hindiston – 2026-yil 24-mart – O‘zbekistonning eng yirik xususiy aviatashuvchisi va Centrum Holding tarkibiga kiruvchi Centrum Air aviakompaniyasi Verteil Technologies texnologiyalari asosida ishlab chiqilgan yangi avlod riteyling va distributsiya platformasi ishga tushirilganini e’lon qildi. Buning uchun buyurtmalarni boshqarish tizimi (Order Management System, OMS) asosida ishlaydigan hamda platformaning asosiy funksional imkoniyatlarini o‘zida mujassamlashtirgan brendlangan NDC API Gateway va NDC Agency Portal Centrum Air ishga tushirildi. Ushbu arxitektura aviakompaniyaga tegishli bo‘lgan riteyling, distributsiya va hamkorlar bilan o‘zaro aloqalarni rivojlantirish uchun zamonaviy texnologik asosni shakllantiradi.

IATA tomonidan ishlab chiqilgan zamonaviy Offer & Order riteyling tamoyillariga asoslangan ushbu platforma Centrum Air’ga NDC doirasidagi rivojlanishni jadallashtirish hamda barcha kanallar orqali o‘z mahsulotlarini yaratish, distributsiya qilish va ularga xizmat ko‘rsatish ustidan yuqori darajadagi nazoratni ta’minlash imkonini beradi. Platformaning ishga tushirilishi aviakompaniyaning yanada moslashuvchan va zamonaviy riteyling modeliga o‘tishidagi muhim bosqich hisoblanadi.

Platforma tavsifi

Ushbu yechim joriy etilishi bilan Centrum Air buyurtmalarni boshqarish, NDC-ulanish va agentliklarga xizmat ko‘rsatishni yagona brendlashtirilgan muhitda birlashtiruvchi yaxlit texnologik ekotizimga ega bo‘ladi. Verteil kompaniyasi loyihaning texnologik hamkori va ijrochisi sifatida ishtirok etib, nafaqat yetakchi NDC-agregatorlaridan biri, balki aviakompaniyalar uchun zamonaviy aviatsiya riteylingiga o‘tishni qo‘llab-quvvatlovchi IT-provayder sifatidagi mavqeini ham mustahkamladi.

Hamkorlarni to‘liq avtomatlashtirilgan tarzda ulash platformaning asosiy imkoniyatlaridan biri bo‘lib, bu Centrum Air’ga ham IATA, ham no-IATA agentliklarini tez va xavfsiz tarzda ulashga sharoit yaratadi. Natijada distributsiya kanallarini kengaytirishdagi an’anaviy qiyinchiliklar barham topadi, ortiqcha vaqt yo‘qotilishining oldi olinadi, shuningdek, aviakompaniyaga tijoriy nazoratni saqlab qolgan holda rivojlangan va o‘sib borayotgan bozorlarda hamkorlik tarmog‘ini kengaytirish uchun masshtablanuvchi vosita taqdim etadi.

To‘lovlar va distributsiya

Yangi platforma turli hisob-kitob modellari, jumladan, BSP, bank kartalari orqali to‘lovlar va transchegaraviy hamda agentlik operatsiyalari uchun dolzarb bo‘lgan muqobil to‘lov usullarini qo‘llab-quvvatlagan holda yanada moslashuvchan to‘lov infratuzilmasini taqdim etadi. Bu distributsiyani yanada kengaytirish va turli bozorlarda tranzaksiyalarni boshqarish moslashuvchanligini oshirish uchun mustahkam poydevor yaratadi.

O‘zining riteyling va distributsiya platformasini rivojlantirish bilan bir qatorda, Centrum Air kontenti Verteil agregatori orqali ham taqdim etiladi, bu esa ulangan agentliklar va hamkorlarning global tarmog‘i hisobiga aviakompaniya qamrovini kengaytiradi. Umuman olganda, bu Centrum Air’ga aviakompaniyaning o‘zi tomonidan boshqariladigan zamonaviy texnologik infratuzilmaga tayangan holda distributsiyani yanada tezroq va samaraliroq kengaytirish imkonini beradi.

Tomonlarning izohlari

Centrum Holding asoschisi va bosh direktori Abdulaziz Abduraxmanov shunday dedi:

«Ushbu platformaning ishga tushirilishi Centrum Air rivojlanishida hamda global turizm bozori bilan o‘zaro hamkorlikni yo‘lga qo‘yishimizda muhim bosqichdir. Parvozlar geografiyasining kengayishi, reyslar chastotasining ortishi va mintaqadagi mavqeyimizning mustahkamlanishi tezkorlik, moslashuvchanlik va nazoratni ta’minlovchi zamonaviy riteyling va distributsiya tizimini talab etadi. Bu bizga nafaqat NDC doirasidagi rivojlanishni jadallashtirish, balki hamkorlar bilan o‘zaro aloqalarni va ularning turli bozorlarda ulanishini soddalashtirish imkonini ham beradi. Verteil yechimi biz uchun zarur texnologik asosni yaratib, zamonaviy tijorat infratuzilmasidan foydalangan holda biznesni kengaytirish borasidagi maqsadlarimizni qo‘llab-quvvatlaydi».

Verteil Technologies asoschisi va bosh direktori Jerrin Jos shunday qo‘shimcha qildi:

«Centrum Air bilan hamkorligimiz zamonaviy aviatsiya riteylingi ekotizimini yaratish borasidagi umumiy qarashlarimizni aks ettiradi. Ushbu platformaning ishga tushirilishi bugungi kunda aviakompaniyalar oddiy integratsiya doirasidan chiqib, o‘zlarining riteyling infratuzilmasiga sarmoya kiritayotganini ko‘rsatmoqda. Mazkur yechim brendlashtirilgan NDC-ulanish, buyurtmalarni boshqarish, agentliklar bilan ishlash va zamonaviy to‘lov mexanizmlarini o‘sishga yo‘naltirilgan yagona platformada birlashtiradi. Verteil uchun esa bu yetakchi NDC agregatoridan aviakompaniyalarning strategik IT hamkoriga aylanganimizni anglatadi. Biz ularga distributsiyani modernizatsiya qilish, NDC joriy etilishini jadallashtirish va soha rivojida navbatdagi bosqich uchun texnologik asos yaratishda yordam bermoqdamiz».

Centrum Air kompaniyasi haqida

Centrum Holding tarkibiga kiruvchi Centrum Air O‘zbekistonning eng yirik xususiy aviakompaniyasi hisoblanadi. Aviakompaniya floti tor va keng fyuzelyajli 14 ta zamonaviy Airbus havo kemasidan iborat bo‘lib, ular 50 dan ortiq yo‘nalishlar bo‘yicha parvozlarni amalga oshirmoqda. Kompaniya O‘zbekistondagi xablari orqali ishonchli aviaaloqani ta’minlab, yo‘nalishlar tarmog‘ini faol rivojlantirmoqda.

Verteil Technologies kompaniyasi haqida

2016-yilda tashkil etilgan va bosh qarorgohi Kochi (Hindiston) shahrida joylashgan Verteil Technologies Dubay, Yaponiya, Nigeriya va Keniyada o‘z vakolatxonalariga ega. Kompaniya IATA NDC standarti asosida aviakompaniyalar va sayyohlik agentliklari uchun yechimlarga ixtisoslashgan sayohat texnologiyalari provayderi hisoblanadi. Verteil texnologiyalari aviakompaniyalarga zamonaviy riteyling infratuzilmasini, jumladan, API-integratsiyalar, agentlik portallari, buyurtmalarni boshqarish tizimlari va IATA distributsiya standartlariga mos keladigan to‘lov yechimlarini joriy etish imkonini beradi.